孫立民：KO 阻你發圍的沙石

一粒在路上的沙石，輕飄飄，孤零零，你不會因它而停下來。不過當沙石進入了鞋子裡，走到你的前腳掌，起初有點不舒服，叮多痛。你會忍耐，不想因一粒沙石停下來。不過每行一步都會被它在同一個傷口啃一啃，觸動了更多的神經線。

你還是因怕麻煩沒有清理鞋子，沒多久，磨擦生出水泡，開始挑戰你能容忍的底線，到了此時你步履蹣跚，一瘸一拐而行，最後被迫停止前進，你被一粒沙石絆倒！

每個人都有幾粒沙石

每個人都有一些小缺點或不良習慣，唔輸得、冇耐性、衰多口、情緒化、冇手尾、坐唔定、甩甩漏……。不是嚴重缺失，自己知，人地都覺，不過懶得改，唔死得人，就由得佢，可以hea的話，不會郁。

這些只得幾毫米的沙石，每個人都有幾粒，原本不太礙事。不過當落入一些關鍵位置，傷口會放大，痛央會升級。

甩甩漏

你粗心甩漏，一時遺下手機，一時唔見鎖匙，間中打別字，成日唔記得熄燈放工。唔死得人，最多講聲sorry，日子一樣咁過。

不過假如你負責處理重要文件，打錯銀碼、交貨日期仲寫2015、甚至搭的士留低公司客戶資料隻手指，你要做很多很多的工作，花很多很多的時間去彌補，升職當然無望，分分鐘連份工也不保。

唔輸得

你唔輸得，被人話幾句，會起晒槓，為自己辯護：

唔係噃，我諗你誤會左我個意思囉。

或把責任推卸給別人：

呢個idea係Peter提出嚟，我都係照佢意思做啫。

你和朋友同事相處，他們未必會回擊，不過當上司給你一點批評，你也反白眼黑晒面倒抽一口涼氣，上司看在眼裡，見你「咁唔話得」，不會高興。有些會感到不被尊重、被挑機，於是鬧得你再甘X3，對你再嚴厲X3。Make your life difficult!

有些會覺得為甚麼要受下屬氣，但又不想勞氣，於是以後都避免指出你的錯處，不會提點一下你，費時看你面色，當然一些重要的工作也不會分派給你，省得遭人藐咀，又要觀賞你的眼白。沒多久你對公司便失去價值，被另一些輸得起的同事取代，你會送去堆填。

致命沙石

一粒0.1厘米的膽石，塞在膽囊管中，一兩日間便會令膽囊蓄膿壞死，你會絞痛噁心，甚至造成膽管炎和黃疸，最終演變成敗血症。

每個人總會有點沙石，冇事就冇事，他們是你的老朋友，朝見口，晚見面，熟到唔覺存在。當沙石走到工作或生活的關鍵位置，會磨出水泡，令你的路頓時變得蹎跛難行。

衰多口，冇朋友，做宅男吧。當你想搵個人傾訴，希望有friend扶一扶，發現身邊除了有百幾隻pokemon，什麼也沒有，冇補給站，縱使CP值喪高，你真的想死。

與其花錢去花心血去執靚塊面，打botox，甚至僭建事業線，不如的起心肝，KO阻你發圍、令你被unfriend的沙石性格。是動用你CP值的時候了！

各位若遇到職場管理、辦公室政治、人際衝突、或前途抉擇等難題，歡迎留言提出。筆者會詳盡分析和解答，亦可瀏覽盈力僱員服務顧問網頁。